By Admin 
हुतात्मा चंद्रशेखर आजाद यांच्या जन्मस्थळाला सुधीर मुनगंटीवार यांनी भेट
चंद्रशेखर आजाद नगर, (जि.अलिराजपूर, मध्य प्रदेश) ,
भारतीय स्वातंत्र्याच्या लढ्यात ब्रिटिशांविरुद्ध तरुणांना एकत्र करुन क्रांतीकारक लढा देणाऱ्या आणि हौतात्म्य पत्करणाऱ्या चंद्रशेखर आजाद यांच्या स्वप्नातील सुराज्य साकारण्याची जबाबदारी आता आपली सर्वांची आहे, असे प्रतिपादन महाराष्ट्राचे सांस्कृतिक कार्य, वने आणि मत्स्यव्यवसाय मंत्री सुधीर मुनगंटीवार यांनी केले आहे. आजाद यांच्या स्मारकातून मी प्रचंड ऊर्जा घेऊन परत जात आहे, असेही ते म्हणाले. चंद्रशेखर आजाद नगर (भापरा) या अमर हुतात्मा चंद्रशेखर आजाद यांच्या मध्य प्रदेशातील जन्मस्थळाला सोमवारी भेट दिली तेव्हा ते बोलत होते. सुधीर मुनगंटीवार सध्या मोदी@9 महासंपर्क अभियानासाठी मध्यप्रदेश दौऱ्यावर आहेत.
या दौऱ्यात त्यांनी अलिरजपूर जिल्ह्यातील आदीवासी बहुल भागातील भापरा (चंद्रशेखर आजाद नगर) येथील हुतात्मा चंद्रशेखर आजाद यांच्या जन्मस्थळाला स्थानिक जिल्हा भाजपा पदाधिकाऱ्यांसह सोमवारी भेट दिली. चंद्रशेखर आजाद यांच्या पुतळ्याला माल्यार्पण केल्यानंतर त्यांनी या स्मारकात असलेल्या चंद्रशेखर आजाद यांच्या जीवनावरील चित्र व छायाचित्र प्रदर्शनला भेट दिली. यावेळी स्थानिक कार्यकर्त्यांसोबत बोलतांना त्यांनी भारावून गेल्याची भावना व्यक्त केली.